मुंबई: “येत्या २५ जून २०२६ पासून महाराष्ट्रातील १२ जिल्ह्यांमध्ये घरगुती वीजबिल पूर्णपणे माफ केले जाणार आहे,” असा एक मेसेज सध्या सोशल मीडिया प्लॅटफॉर्म्सवर तुफान व्हायरल होत आहे. या मेसेजमुळे सर्वसामान्य वीज ग्राहकांमध्ये संभ्रमाचे वातावरण निर्माण झाले होते. मात्र, आता या व्हायरल दाव्यामागील सत्य समोर आले असून, हा दावा पूर्णपणे खोटा (Fake) असल्याचे स्पष्ट झाले आहे.
शासनाच्या अधिकृत माहिती व जनसंपर्क महासंचालनालयाने (DGIPR Fact Check) या प्रकरणाची दखल घेत सत्य जनतेसमोर आणले आहे.
Fact Check: सोशल मीडियावरील दाव्यात तथ्य नाही!
गेल्या काही दिवसांत व्हॉट्सॲप, फेसबुक आणि इतर सोशल मीडिया माध्यमांवरून नागरिकांची दिशाभूल करणारी एक पोस्ट फिरत होती. त्यामध्ये २५ जूनपासून १२ जिल्ह्यांचे वीजबिल शून्य होणार असल्याचा आव आणण्यात आला होता. महावितरण (MSEDCL) आणि राज्य शासनाने अशा प्रकारचा कोणताही निर्णय घेतलेला नाही.
केवळ वीजदरात कपातीची घोषणा: राज्य शासनाने केवळ टप्प्याटप्प्याने वीजदरांमध्ये कपात (Electricity Tariff Reduction) करण्याची घोषणा केली आहे.
बिल पूर्ण माफ नाही: घरगुती वीज ग्राहकांसाठी संपूर्ण वीजबिल रद्द किंवा माफ करण्याबाबत सरकारने कोणतीही घोषणा केलेली नाही, असे प्रशासनाकडून स्पष्ट करण्यात आले आहे.
नागरिकांना सतर्क राहण्याचे आवाहन
अशा प्रकारच्या कोणत्याही अपुऱ्या, अधिकृत घोषणा नसलेल्या आणि दिशाभूल करणाऱ्या मेसेजवर नागरिकांनी विश्वास ठेवू नये, असे आवाहन महावितरण आणि राज्य शासनाच्या वतीने करण्यात आले आहे. वीजबिला संदर्भातील कोणत्याही अधिकृत निर्णयाची माहिती केवळ महावितरणच्या अधिकृत संकेतस्थळावर किंवा शासनाच्या अधिकृत प्रसिद्धीपत्रकाद्वारेच दिली जाते.
त्यामुळे अशा खोट्या बातम्या पुढे फॉरवर्ड न करता नागरिकांनी सतर्क राहावे, असे आवाहन ‘युवा प्रभाव न्यूज’च्या वतीने करण्यात येत आहे.
