मुंबई (२ ऑक्टोबर २०२६): मुख्य निवडणूक आयुक्त (CEC) ज्ञानेश कुमार यांच्या तातडीच्या राजीनाम्याची मागणी करत कॉकरोज जनता पार्टीच्या (CJP) वतीने आज, २ ऑक्टोबर (गांधी जयंती) रोजी मुंबईतील ऐतिहासिक शिवाजी पार्कबाहेर जोरदार आंदोलनाला सुरुवात झाली आहे. पक्षाच्या आवाहनानुसार शिवाजी पार्क परिसराबाहेर मोठ्या संख्येने कार्यकर्ते आणि नागरिक जमण्यास सुरुवात झाली असून परिसरातील वातावरण तापले आहे.
परवानगी नाकारल्यानंतर ‘जेल भरो’चा निर्णय
मुंबई पोलीस आणि उच्च न्यायालयाच्या नियमावलीचा हवाला देत प्रशासनाने शिवाजी मैदानावर सभा/आंदोलन घेण्यास परवानगी नाकारली होती. मात्र, लोकशाही मार्गाने विरोध नोंदवण्याच्या आपल्या हक्कावर ठाम राहत कॉकरोज जनता पार्टीचे संस्थापक अभिजित दिपके आणि पक्षाच्या प्रमुख नेत्यांनी ‘चलो मुंबई’ आणि ‘जेल भरो आंदोलनाचा’ पवित्रा घेतला.
प्रमुख मागण्या: मुख्य निवडणूक आयुक्त ज्ञानेश कुमार यांनी आपल्या पदाचा राजीनामा द्यावा, ही पक्षाची मुख्य मागणी आहे.
गांधी जयंतीचे औचित्य: महात्मा गांधी यांच्या जयंतीदिनी अहिंसक आणि सत्याग्रहाच्या मार्गाने आपले आंदोलन नोंदवण्यासाठी पक्षाने २ ऑक्टोबरची निवड केली आहे.
शिवाजी पार्क परिसरात कडक पोलीस बंदोबस्त
आंदोलनकर्ते मोठ्या संख्येने गोळा होत असल्याचे पाहून दादर आणि शिवाजी पार्क परिसरात मुंबई पोलिसांकडून अत्यंत कडक सुरक्षा व्यवस्था तैनात करण्यात आली आहे. वाहतुकीची कोंडी होऊ नये आणि कायदा व सुव्यवस्था अबाधित राहावी यासाठी अतिरिक्त पोलीस बल तैनात करण्यात आले असून, आंदोलकांना ताब्यात घेण्याची तयारी प्रशासनाकडून करण्यात येत आहे.
आंदोलनकर्त्यांच्या घोषणाबाजीमुळे आणि ‘जेल भरो’च्या इशाऱ्यामुळे मुंबईतील राजकीय आणि सामाजिक वर्तुळात खळबळ उडाली आहे.
– ब्युरो रिपोर्ट, युवा प्रभाव न्यूज
