नवी दिल्ली: कॉकरोच जनता पार्टीचे (CJP) मुख्य प्रवक्ते आणि शोधपत्रकार सौरव दास यांनी आज एका पत्रकार परिषदेत महत्त्वपूर्ण घोषणा केली आहे. येत्या ६ जून रोजी दिल्लीत एका मोठ्या आंदोलनाची तयारी सुरू असल्याची माहिती त्यांनी दिली.
पत्रकार परिषदेत बोलताना सौरव दास म्हणाले, “अभिजीत दिपके हे ६ जून रोजी सकाळी ठीक ८ वाजता दिल्ली विमानतळावर उतरणार आहेत. त्यांनी आपल्या सर्व समर्थकांना मोठ्या संख्येने विमानतळावर येऊन त्यांचे स्वागत करण्याचे आवाहन केले आहे.”
ते पुढे म्हणाले की, विमानतळावर स्वागत केल्यानंतर अभिजीत दिपके, त्यांचे सर्व समर्थक आणि ‘वांगचुक जी’ एकत्र येऊन पार्लमेंट स्ट्रीटच्या (संसद मार्ग) दिशेने कूच करणार आहेत. जंतर-मंतर येथे शांततापूर्ण मार्गाने आंदोलन करण्यासाठी आवश्यक असणारी रीतसर परवानगी मागण्याचा यामागील मुख्य उद्देश आहे.
या आंदोलनाचे स्वरूप व्यापक असल्याचे स्पष्ट करत सौरव दास यांनी पक्षभेद विसरून सर्वांना एकत्र येण्याचे आवाहन केले आहे. “आम्ही सर्व राजकीय पक्षांमधील नेत्यांना, कार्यकर्त्यांना आणि जनतेला या आंदोलनात सहभागी होण्यासाठी जाहीर निमंत्रण देत आहोत,” असे दास यांनी पत्रकार परिषदेत नमूद केले.
या घोषणेमुळे ६ जून रोजी दिल्लीतील पार्लमेंट स्ट्रीट आणि जंतर-मंतर परिसरात राजकीय आणि सामाजिक घडामोडींना वेग येण्याची शक्यता वर्तवली जात आहे.
