🥇 चेंबूरच्या लेकींची सुवर्ण भरारी! ‘तायक्वांडो’ राज्य अजिंक्यपद स्पर्धेत दीक्षा आणि भूमी अहिरे चमकल्या; दीक्षाची राष्ट्रीय स्पर्धेसाठी निवड

मुंबई ( प्रतिक सावंत) : पुण्यातील जेजुरी येथे पार पडलेल्या ‘सिनिअर ओपन स्टेट तायक्वांडो चॅम्पियनशिप २०२६’ मध्ये मुंबईतील चेंबूरच्या कन्यांनी आपल्या कौशल्याच्या जोरावर घवघवीत यश संपादन केले आहे. चेंबूर येथील सिद्धार्थ कॉलनीमध्ये राहणाऱ्या कु. दीक्षा निलेश अहिरे आणि कु. भूमी निलेश अहिरे या दोन बहिणींनी राज्यस्तरीय स्पर्धेत पदकांची लयलूट करत चेंबूरच्या शिरपेचात मानाचा तुरा रोवला आहे.

​२६ मे २०२६ रोजी झालेल्या या चुरशीच्या स्पर्धेत महाराष्ट्रातील कानाकोपऱ्यातून आलेल्या खेळाडूंनी सहभाग घेतला होता.

​बहिणींची पदकांची ‘डबल’ कामगिरी:

दीक्षा अहिरे (सुवर्ण पदक – 🥇): ५३ किलो वजनी गटात (Under 53 Kg) अप्रतिम खेळाचे प्रदर्शन करत दीक्षाने सुवर्ण पदकावर आपले नाव कोरले. या सुवर्ण कामगिरीमुळे तिची आता ‘राष्ट्रीय तायक्वांडो स्पर्धेसाठी’ (National Championship) भारतीय स्तरावर निवड झाली असून, ती महाराष्ट्राचे प्रतिनिधित्व करणार आहे.

​भूमी अहिरे (कांस्य पदक – 🥉): ४६ किलो वजनी गटात (Under 46 Kg) खेळताना भूमीने आपल्या आक्रमक खेळीच्या जोरावर कांस्य पदक पटकावले आणि राज्याच्या सर्वोत्तम खेळाडूंमध्ये स्थान मिळवले.

​सिद्धार्थ कॉलनीसह चेंबूरमध्ये जल्लोष

​दीक्षा आणि भूमी यांच्या या यशाची बातमी समजताच चेंबूरच्या सिद्धार्थ कॉलनी आणि परिसरात आनंदाचे वातावरण पसरले आहे. अत्यंत खडतर मेहनत, जिद्द आणि सातत्यपूर्ण सरावाच्या जोरावर या दोन्ही भगिनींनी हे यश खेचून आणले आहे. “दोन्ही मुलींनी केवळ त्यांच्या कुटुंबाचेच नव्हे, तर संपूर्ण चेंबूर आणि मुंबईचे नाव क्रीडा जगतात उज्ज्वल केले आहे,” अशा भावना स्थानिक नागरिकांनी व्यक्त केल्या.

​पुढील प्रवासासाठी शुभेच्छांचा वर्षाव

​राज्यस्तरावर सुवर्ण आणि कांस्य पदकाची कमाई करणाऱ्या या दोन्ही खेळाडू मुलींवर सध्या सर्व स्तरांतून कौतुकाचा वर्षाव होत आहे. सुवर्णपदक विजेती दीक्षा आता राष्ट्रीय पातळीवर देशात महाराष्ट्राचा झेंडा रोवण्यासाठी सज्ज झाली असून, तिला पुढील स्पर्धेसाठी ‘युवा प्रभाव’ परिवारातर्फे व क्रीडाप्रेमींतर्फे खूप-खूप शुभेच्छा!💐

​नवनवीन आणि ताज्या अपडेट्ससाठी वाचत राहा ‘युवा प्रभाव’ – तरुण भारताचा नवा आवाज!