दिल्लीच्या जंतर-मंतर मैदानावर मागील २० दिवसांपासून सुरू असलेला ज्येष्ठ पर्यावरण आणि शिक्षण कार्यकर्ते सोनम वांगचुक यांचा बेमुदत अन्नत्याग आता एका अत्यंत अनपेक्षित आणि संतापजनक वळणावर येऊन पोहोचला आहे. ‘नीट’ (NEET-UG 2026) परीक्षा घोटाळा आणि पेपरफुटीमुळे उद्ध्वस्त झालेल्या लाखो तरुण विद्यार्थ्यांच्या भविष्याला न्याय मिळवून देण्यासाठी सुरू असलेल्या या शांततापूर्ण आंदोलनाला चिरडण्यासाठी सत्तेने आता दडपशाहीचा कळस गाठला आहे. आज सकाळीच दिल्ली पोलिसांनी सोनम वांगचुक यांना आंदोलनस्थळावरून जबरदस्तीने उचलले असून, आपल्या हक्कांसाठी शांततेने दाद मागणाऱ्या निष्पाप विद्यार्थी आंदोलकांवर अमानुष लाठीहल्ला केला आहे.
२० दिवसाच्या उपोषणामुळे आधीच सोनम वांगचुक यांची प्रकृती अत्यंत खालावलेली आहे, त्यांचे वजन तब्बल ७.५ ते ९ किलोंनी घटले आहे. अशा संवेदनशील परिस्थितीत एका देशभक्ताला संवाद किंवा तोडगा काढण्याऐवजी बळाचा वापर करून ताब्यात घेणे आणि देशाचे भविष्य असणाऱ्या विद्यार्थ्यांचे रक्त रस्त्यावर सांडणे, ही लोकशाहीची उघडउघड हत्या आहे. केंद्र सरकारचे हे पाऊल त्यांच्या कुंभकर्णी झोपेचे नव्हे, तर त्यांच्या हुकूमशाही मानसिकतेचे आणि कमालीच्या भीतीचे ढळढळीत लक्षण आहे.
सत्ताधाऱ्यांच्या या अमानुष लाठीशाही आणि दडपशाहीविरुद्ध आता देशातील ‘जागृत जनतेने’ घरात बसून चालणार नाही. जेव्हा विद्यार्थ्यांवर लाठ्या चालतात आणि भ्रष्टाचारी शिक्षणमंत्र्यांचा राजीनामा मागणाऱ्या वृद्ध विचारवंताला तुरुंगात डांबले जाते, तेव्हा जनतेचा आक्रोश रस्त्यावर उतरल्याशिवाय राहत नाही. याच पार्श्वभूमीवर, येत्या २० जुलै रोजी ‘चलो संसद’ आणि ‘दिल्ली चलो’चा जो ऐतिहासिक नारा देण्यात आला आहे, त्याचे महत्त्व आता हजार पटीने वाढले आहे. २० जुलैचा हा मोर्चा आता केवळ परीक्षा घोटाळ्याविरोधात राहिलेला नाही, तर तो विद्यार्थ्यांवर झालेल्या लाठीहल्ल्याचा जाब विचारणारा आणि सत्तेची मस्ती उतरवणारा लोकसागर असेल.
केंद्रातील सुस्त आणि जुलमी राज्यकर्त्यांना हे ठाऊक असायला हवे की, लोकशाहीत जनता हीच खरी मालक असते आणि शासकीय यंत्रणा व सत्ताधारी हे केवळ तिचे सेवक असतात. लाठ्यांच्या आणि पोलिसांच्या जोरावर लोकभावना कधीही दाबल्या जाऊ शकत नाहीत. आज या आंदोलनाला केवळ विद्यार्थ्यांचाच नाही, तर देशाचा कणा असलेल्या शेतकरी संघटना, मजूर, प्राध्यापक, सिने कलाकारांचा आणि समाजातील सर्वच स्तरांमधून उत्स्फूर्त पाठिंबा मिळत आहे.
देशातील प्रत्येक जागृत नागरिकाला, तरुणाला, पालकाला आणि लोकशाहीवर विश्वास ठेवणाऱ्या घटकाला ‘युवा प्रभाव’च्या माध्यमातून हेच आवाहन आहे की, आता नाही तर कधी? अन्याय सहन करणे हा सुद्धा एक गुन्हाच आहे. आज जर आपण आपल्या मुलांवर झालेल्या या अन्यायाविरोधात आणि सोनम वांगचुक यांच्या अटकेविरोधात आवाज उठवला नाही, तर येणाऱ्या पिढ्या आपल्याला कधीही माफ करणार नाहीत.
२० जुलै रोजी दिल्लीच्या वेशीवर धडकणारा प्रत्येक पाऊल हा सत्तेच्या लाठीशाहीला चपराक देणारा ठरेल. चला, राजकीय मतभेद बाजूला सारून, एकसंध होऊन सोनम वांगचुक यांच्या पाठीशी आणि विद्यार्थ्यांच्या हक्कासाठी वज्रमुठ करून उभे राहूया. २० जुलैला अभूतपूर्व संख्येने दिल्लीत धडकून या दडपशाही करणाऱ्या सरकारचे आसन हलवून टाकूया; कारण हा लढा आता केवळ शिक्षणाचा राहिलेला नाही, तर तो देशाची अस्मिता, तरुणांचा स्वाभिमान आणि लोकशाही टिकवण्याचा आहे!
– प्रफुल गोरख कांबळे
संपादक, युवा प्रभाव न्यूज
Email : yuvaprabhav@gmail.com
