कविता – अक्षरगंध सावित्रीचा….

असमानतेच्या जात्यात
भरडत होतं हो आयुष्य
चार भिंतींत जगण्यातच
बंदिस्त स्त्रियांचं भविष्य

सावित्रीच्या रूपात उभी
परिवर्तनाची तप्त मशाल
ज्योतिंबासह तोडली ती
अज्ञानतेची भिंत विशाल

शिक्षणरूपी सुमनांतुनी
पसरला असा अक्षरगंध
भेदभावात जखडलेला
गळला अमानवीय बंध

रोमारोमात संचारला हा
दरवळला दशदिशांतुनी
ज्ञानबिंदू सजताच हाती
बहरल्या बालिका गुणी

अक्षरगंध माखून भोवती
चढलाय कर्तृत्वाचा घाट
स्वबळावर निर्मीली तिने
यशस्वीतेची आदर्श वाट

आत्मविश्वासानेच झाली
भल्या बुऱ्याची ओळख
जागृत बुद्धी कौशल्याने
केली माणसांची पारख

मताधिक्य नि धाडसाने
केला अन्यायाचा विरोध
आत्मसन्मानाची लढाई
देते आम्हांस प्रखर बोध

सावित्री कमळपुष्पातील
अक्षरगंध ठरलाय प्रेरक
गाव खेड्यात घडताहेत
आज उच्च विद्या धारक

कवयित्री : मीता अशोकराव नानवटकर
सावनेर, नागपूर
9823219083

डिस्क्लेमर (अस्वीकरण) : या लेखात व्यक्त केलेली मते लेखकाची वैयक्तिक मते आहेत. या लेखातील कोणत्याही माहितीची अचूकता, पूर्णता, व्यावहारिकता किंवा सत्यता यासाठी www.YuvaPrabhav.Com जबाबदार नाही. या लेखातील सर्व माहिती जशी आहे तशी मांडली आहे. या लेखात व्यक्त केलेली कोणतीही माहिती किंवा तथ्ये किंवा विचार YuvaPrabhav च्या मालकीचे नाहीत आणि YuvaPrabhav त्यांच्यासाठी कोणत्याही प्रकारे जबाबदार नाही. – एडिटर – इन – चीफ

बातम्या, लेख, साहित्य आमच्याकडे पाठवा, आम्ही www.YuvaPrabhav.Com या मराठी न्यूज पोर्टल वर प्रकाशित करू. Email : yuvaprabhav@gmail.com