Mumbai : अनधिकृत दुकानांवर कारवाई करण्यासाठी गेलेल्या टी वार्डच्या पालिका अधिकाऱ्याला मारहाण झाल्याची धक्कादायक बातमी समोर येत आहे. शिवसेना उद्धव ठाकरे गटाच्या शाखा प्रमुखाने पालिका अधिकाऱ्याला मारहाण केल्याची घटना मुलुंड परिसरात घडली आहे. याबाबत अधिकाऱ्याच्या तक्रारीवरून मुलुंड पोलिसांनी गुन्हा दाखल करून तपास सुरू केला आहे.
मुलुंडच्या वैशाली नगर परिसरातील पदपथावरील अनधिकृत दुकानावर कारवाई करण्यासाठी पालिकेच्या टी वॊर्डचे काही अधिकारी शनिवारी सकाळी तेथे गेले होते.
कारवाई पूर्ण झाल्यानंतर अधिकारी पुन्हा कार्यालयात परतत असताना रस्त्यात त्यांना शिवसेना उद्धव ठाकरे गटाचे शाखा प्रमुख आनंद पवार यांनी अडवले. स्टॉलवर कारवाई केल्याने त्यांनी कर्तव्यावर असलेल्या अधिकाऱ्यांना शिवीगाळ केली. त्यावेळी पालिकेचे वरिष्ठ निरीक्षक रमेश साळवे यांनी त्यांना समजवण्याचा प्रयत्न केला. मात्र शाखा प्रमुखाने त्यांना देखील शिवीगाळ करून थप्पड मारली. पालिका अधिकाऱ्यांनी तत्काळ पोलिसांशी संपर्क साधल्यानंतर पोलिसांनी तत्काळ घटनास्थळी धाव घेतली. त्यानंतर मुलुंड पोलिसांनी पालिका अधिकाऱ्याच्या तक्रारीवरून शिवसेना शाखा प्रमुखावर गुन्हा दाखल केला असून पोलीस याबाबत अधिक तपास करत आहेत.
